Publikuar më: 14/10/2025

Të ardhurat e përjashtuara

Në kuadër të ligjit për tatimin mbi të ardhurat, disa të ardhura nuk janë subjekt i tatimit dhe për këtë arsye nuk tatohen. Kjo do të thotë që këto të ardhura janë të përjashtuara dhe nuk duhen përfshirë në bazën tatimore.

Të ardhurat që nuk tatohen janë:

• Të ardhurat nga sigurimet shoqërore dhe shëndetësore të detyrueshme, që përfshijnë pagesat që merrni nga skema kombëtare e sigurimeve;
• Ndihmat ekonomike nga buxheti shtetëror për personat që nuk kanë të ardhura ose kanë të ardhura të ulëta, sipas ligjit në fuqi;
• Të ardhurat e përjashtuara sipas marrëveshjeve ndërkombëtare, të cilat janë ratifikuar nga Kuvendi i Shqipërisë;
• Kompensimet financiare për shpronësime, që paguhen nga shteti për pronarët e pronave të shpronësuara për interesa publike;
• Kompensimet financiare për ish-të dënuarit politikë dhe pasardhësit e tyre;
• Shpërblimet dhe çmimet e dhëna nga institucionet shtetërore për arritje në fushën e shkencës, sportit dhe kulturës;
• Bursat për nxënësit dhe studentët;
• Dëmshpërblimet e marra nga vendimet gjyqësore të formës së prerë, përfshirë ato nga kontratat e sigurimit dhe kompensimet për shpenzimet gjyqësore;
• Të ardhurat nga grante dhe subvencione në bujqësi dhe blegtori, të financuara nga buxheti i shtetit ose nga burime të tjera.